කුමරී
නිසොල්මනේ
සැතපෙයි නිදි යහන මත
දකිමින් සුබ සිහින
හෙට දවස පිලිබඳව
මුව මඩල මත වැටුනු
අවුල් වූ කෙහෙරැලි
අතරින් මතුවේය
සිහින දකින කල
සිහින් සිනහවක්
උදෑසන පිබිදෙන
මලක් සේ සුන්දර
සැඩ සුළං හැමූ
බියකරු රාත්‍රිය
දෙකම්මුල් පෙති මත
අතුල
කඳුළු බිඳු
පිස දමයි සිහිනෙන්ම
සිහිනය නිම වී
සැබෑ ලොවට පැමිනි කල
ඈ
නිදි ගැහැට හැර
විමසයි දුක්බරව
“සැබෑ ලොව සිහිනයට කෙතරම් සතුරුද?”
සැබෑ ලොව කෙතරම්
කටුක වූවද
සුන්දර හෙට දිනක් ගැන
සිහිනය බිඳ නොහෙලනු මැන
සිහිනය මිහිරි වන්නේ
එය සැබැවන තරමටම
නොවෙද
එන්න
අපි ඇවිද යමු
අතින් අත නොහැරම
රළු බොරලු ඇතිරුනු
කටුක
ජීවිත මාවතේ
සිහින සපුරාගන්නට
පහසු නැත එය
නමුත්
අප තනා ගත යුතුය
සිහින සපිරෙන ලොවක්
~සකුන්ත හිරිමුතුගොඩ~