මම පතමි රාත්‍රිය
තව ටිකක් දිගුවෙන්න
අතැඟිලි ලිහී ගිය
කාරනා විමසන්න
දිවා කල පුරාවට
පටලවාගෙන අතිනත
නුඹ සමග ඇවිද ගිය
වෙහෙසකර දුෂ්කර
ගමන් මග දෙස
ආපසු හැරී
වැරදුණු තැන්
සොයා බලන්නට
මම පතමි රාත්‍රිය
තව තවත් දිගුවෙන්න
හෙට නැගෙන අරුණැල්ලට
සුබ සිතින් සැරසෙන්න
~සකුන්ත හිරිමුතුගොඩ~
කිසිවෙකුත් නාඳුනන බිමෙක
සුවඳ තවරා ගිය
දිනපොතෙක පිටු අතර හමුවූ
සිහින කුසුමය
නුඹ
ජීවිතය සරසමින්
අතින්වත් නොඅල්ලා
ආදරය කියාදෙන..
~සකුන්ත හිරිමුතුගොඩ~
මේ කදුළු කැට
තෙත බරිතව දුකම
පමණක් නොව
ඉන් මිදීමට
අලුත් බලාපොරොත්තුවක් ද
කැටි කොට
දිලිසෙන බැවින්
මම ඒවාට පෙම් කරමි..
~සකුන්ත හිරිමුතුගොඩ~
ඔබ මා සතු නැත
ඔබ ගැන ලියන්නටද මට වරම් නැත
එබැවින් මේ සියල්ලම
අනවසරයෙන් ගෙතූ කවිය
~සකුන්ත හිරිමුතුගොඩ~
මම වර්නවත් වූ ලෝකයට
කැඩපතක් ඇල්ලූයෙමි,
දැන් ඔබ
කැඩපත බිඳ දමා
ඒ ලෝකයම තනි වර්නයකින්
සීමා මායිම් තුල
ප්‍රතිනිර්මානය කරන්නට
මට අන කර ඇත
සකුන්ත හිරිමුතුගොඩ