අහස් ගැබ තරනය

ඔබ බැලුවෙ දුර ඇත

තුරු මුදුන් කඳු මුදුන් හිස

දුර ඈත දිලෙන තරුවල් දිහා

ගව් ගනන් දුර අහසට එල්ලය බලාගෙන

ඔබ කිව්වෙ හඳට ගලක් ගැහුවොත්

පොල් ගසක හෝ රැඳෙන වග

මම බැලුවෙ මෑත දිහා

පඩියෙන් පඩිය නගින හැටි

පාමුලෙ සිට කඳු මුදුන් දෙසට

මාන බලමින් අඩියෙන් අඩිය

සැරසෙමින් පියවරින් පියවර

ඉදිරියට තබන්නට

ඉතින් අපි අතර නිරතුරුව

මතුවුනා නොගැලපුම්

නොරිස්සුම්

දුරස් කර දෙදෙන

පුදුමයකි නොහැඟුනු හැටි

අප හට

දෙදෙනාම වෙර දැරුවෙ

අහස් ගැබ කරා

ලඟා වෙන්නට

මුහුකුරා යන විටයි

වැටහුනේ

අහස් ගැබ තරනයට

ඈත එල්ලය ලබා ගෙන

පියවරින් පියවර මෑත තැබිය යුතු බව

කෙලෙස පවරනුද ලඳරුවකුගේ ඉරනම

ගසක අතු අග මල් පිපෙන මුත්

එයට හැකිවෙද උපදවන්නට

තනිවම කුසුම්

අවට පරිසරයෙන් කිසිම

උදව්වක් නොමැතිව,

හිතු මනාපෙට

ඊට පුබුදුවනු නොහැකිය

පොහොට්ටු පවා

හොඳින් වැඩුනු

කෙලෙස පවරනුද 

ලඳරුවෙකුගේ ඉරනම 

විසඳීමේ අයිතිය 

සින්නක්කරව අයෙකුට 

හෝ එක් පසෙකට 

ඔබ අයිති මේ විසල් ලොවටය

 නුඹ එහි කොටසකි

සෙවීම

ලියන කවි පද අතර

ලිහා ඇති සන්ධි පද

උපමා රූපක දිගැර

මල්ලකට අත දා

පැනි රස සොයන 

පුංචි කෙල්ලක මෙන්

සොයනවා ඇති ඔ බ ව ම

නිශ්ඵලය නොකියන මුත්

නොවෙහෙසෙන්න එලෙසට

නොයෙක් පාට තැවරූ

එකිනෙකින් වෙන් කල නොහැකි

දිය සායම් සිතුවමකි 

කවි පද

ඒ තුල 

සැඟව ඇති ජීවිතය 

යලි ලිහා බලනු මැන