"ජීවිතේ තියෙන ලොකු ම අපරාධ වන්නේ, හුදෙක් වෙඩි තියන, මරන දේවල් විතරක් ම නෙවෙයි, මිනිසුන්ගේ ජීවිත සුපුෂ්පිත කිරීමට ඉඩ නොදීමත් අපරාධයක්"
උපුටා ගැනීමකි
වේලාව රාත්‍රී දොලහට ආසන්නය
නිවෙස් වල විදුලි බුබුළු එකින් එක නිවී යයි
වට පිටාවම නිහඬය
ඈත පාරේ යන වාහනයක ශබ්දයෙන් එයද බිඳී යයි.
ඔබෙන් නොකඩවාම පනිවිඩ පැමිනෙන හඬ නිදිමතට බාධා කරයි
අසිහියෙන් ඒවාට පිලිතුරු යවමි
ජංගම දුරකථනයට පැමිනි පුවතකින් ඇස් අරවයි
“උද්ධමනය තවත් ඉහලට”
යුද්ධයෙන් තත්වය තවත් අමාරු වනු ඇති බවට තවකෙකින් කියවෙයි
ඔබේ පනිවිඩවලට විරාමයක් නැත
“හොඳ ගෙයක්!, වාහනයක්!, හොඳ රැකියාවක්!, හොඳ ජීවිතයක්!”
නොඉවසිල්ලෙන් චැට් තිරය මත ඔබ සිහින දිග හරියි
ඒ සිහින වසාගෙන
තිරය පුරා පුවත් එක පෙලට දිග හැරෙයි…
“පාන් ගෙඩියක මිල රුපියල් තිහකින් ඉහලට”
“තිරිඟු පිටි මිල රුපියල් තිස් පහකින් ඉහලට”
ඔබේ පනිවිඩ වලට නැගෙන සිතුවිලි
ඇඟිලි තුඩු මතට සම්ප්‍රේශනය වීම
මොහොතකට නවතී…
පිලිතුරු පමා වීමෙන් ඇය තරවටු කරයි…
බොහෝ දෑ කල්පනා කොට එකම වචනයකින් පිලිතුරක් ගෙතුවෙමි.
“හ්ම්ම්ම්…”
~සකුන්ත හිරිමුතුගොඩ~
No comments:
Post a Comment